Gwastraff bwyd

Sut mae gwastraff bwyd yn cael ei ailgylchu?

Pan fyddwch yn ailgylchu eich gwastraff bwyd, nid diflannu yn unig mae'n ei wneud – caiff ei drawsnewid yn ynni gwyrdd a gwrtaith llawn maetholion drwy broses o'r enw treulio anaerobig.

Unwaith y caiff ei gasglu o'ch cartref, cludir y gwastraff bwyd i gyfleuster treulio anaerobig. Yma, mae micro-organebau o'r enw 'methanogenau' yn dadelfennu'r gwastraff y tu fewn i danciau caeedig mawr. Wrth i'r bwyd bydru yn yr amgylchedd hwn heb ocsigen, mae'n cynhyrchu bio-nwy – cymysgedd o fethan a charbon deuocsid.

Caiff y bio-nwy hwn ei ddal a'i ddefnyddio i gynhyrchu trydan adnewyddadwy, gwres, a hyd yn oed tanwydd trafnidiaeth. Gall yr ynni gwyrdd a gynhyrchir bweru cartrefi a chymunedau ledled Cymru. Gall un cadi gwastraff bwyd llawn gynhyrchu digon o ynni i bweru teledu am ddwy awr.

Mae'r broses hefyd yn creu hylif o'r enw treuliet (digestate), sef bio-wrtaith llawn maetholion. Caiff hwn ei daenu ar dir fferm ledled Cymru, gan helpu ffermwyr i dyfu cnydau heb orfod dibynnu ar wrteithiau artiffisial sy'n deillio o danwydd ffosil.

Drwy ailgylchu eich gwastraff bwyd, nid yn unig rydych chi'n cynhyrchu ynni glân – rydych hefyd yn atal methan rhag dianc i'r atmosffer. Pan fydd bwyd yn pydru mewn safle tirlenwi, mae'n rhyddhau methan fel nwy tŷ gwydr. Mewn cyfleuster treulio anaerobig, caiff yr un methan hwnnw ei ddal a'i roi ar waith da yn lle hynny.